మీరే సృష్టికర్త కండి! - సద్గురు

July 11, 2013

మనం శాంతియుతంగా జీవించాలనే అనుకుంటాం. శాంతియుతమైన, ప్రేమ పూరితమైన ప్రపంచాన్ని నిజంగా సృష్టించాలనుకుంటే, మనం సృష్టించనూగలం. మనం కోరుకున్న విధంగా జీవితం ఉండాలని మనం అనుకుంటే, అన్నింటికంటే ముందు మనం 'నిజం'గా కోరుకునే దాని గురించిన స్పష్టత ఉండాలి. మనం ఏం కోరుకుంటున్నామో మనకే తెలియకపోతే, ఇక దాన్ని సృష్టించడం అన్న ప్రశ్నే తలెత్తదు కదా! మన జీవితంలోని ప్రతి దశలోనూ " ఇది, ఇదొక్కటీ, ఇదొక్కటీ దొరికితే చాలు. ఇక నా జీవితం అంతా బావుంటుంది'' అనుకుంటూ ఉంటాం. నిజంగానే అది మీకు లభ్యమైనప్పుడు మీకు కావలసింది అది కాదని మీకు అనిపించవచ్చు. ఆ మరుక్షణమే మీ ఆశ ఇంకొక దాని మీదకు వెళుతుంది. ఇది ఇలా నిరంతరంగా జరగుతూనే ఉంటుంది. అందుకే, మీరు నిజంగా కోరుకునేది ఏమిటో గమనించండి. ప్రతి మనిషీ కోరుకునేది శాంతియుతంగా జీవించాలని, ఆనందంగా జీవించాలని. పరస్పర సంబంధాల విషయానికి వస్తే, తాను ప్రేమపూరితునిగా, ఆప్యాయతతో ఉండాలనే ప్రతి మనిషీ కోరుకుంటాడు. మరోమాటలో స్పష్టంగా చెప్పాలంటే, మనిషి కోరుకునేదంతా ఒక్కటే. తన లోపల, బయట, చుట్టూ ఆనందంగా ఉండాలని.

ఆనంద సీమలు

ఆనందం మన శరీరంలో ఉంటే దాన్ని మనం ఆరోగ్యం, సుఖం అంటాం. అది మన మనసులో ఏర్పడితే శాంతి, సంతోషం అంటాం. అది మన భావాల్లో ఏర్పడితే దాన్ని ప్రేమ, దయ అంటాం. అది మన ప్రాణశక్తిలో ఏర్పడితే దాన్ని పరమానందం, పారవశ్యం అంటాం. అంటే, అంతరంగంలో ఒక ఆనందరూపుడైన మానవునిగా, బయటి ప్రపంచం శాంతి పూర్వకంగా, ప్రేమ భరితంగా ఉండాలనుకుంటున్నాం. మీరు కోరుకునేది ఇదే. అయితే మనం దాన్ని సూటిగా నెరవేర్చవలసిన సమయం ఇప్పుడు ఆసన్నమైంది. దాన్ని సృష్టించడానికి మనల్ని మనం బద్ధులం చేసుకోవలసిన సమయమిది. దీని కోసం మనం చేయవలసిందల్లా ఒక్కటే. మనలో మనం శాంతియుతంగా, ఆనంద భరితంగా, ప్రేమపూర్వకంగా ఉండడమే. అందుక ని మనం ప్రతి రోజూ స్పష్టమైన ఒక ఆలోచనతో 'ఈ రోజున, మనం ఎక్కడికి వెళితే అక్కడ, ఒక శాంతిభరితమైన, ప్రేమ పూర్వకమైన ప్రపంచాన్ని సృష్టిస్తాం' అని ఆరంభించాలి. ఒకవేళ మనం, రోజుకు వందసార్లు ఓడిపోతే, వంద పాఠాలు నేర్చుకున్నట్లు. అసలు నిబద్ధుడైన మనిషికి ఓటమి అనే మాటే ఉండదు. వారికి విజయమో లేక గుణపాఠమో ఇవి మాత్రమే ఉంటాయి.

ఆ నాలుగూ కలిస్తే...

మనం నిజంగా కోరుకునేదాన్ని సృష్టించుకోవడం కోసం, మనల్ని మనం బద్ధుల్ని చేసుకున్నామనుకోండి. మన మనసు కూడా క్రమబద్ధం అవుతుంది. ఒకసారి మన మనసు క్రమబద్ధం కాగానే, మన భావోద్వేగాలు క్రమబద్ధం అవుతాయి. మన ఆలోచనల్ని అనుసరించే మన భావాలు ఉంటాయి. ఒకసారి మన ఆలోచనలు, భావోద్వేగాలు క్రమబద్ధం అయిపోతే, మన ప్రాణ శక్తులు అన్నీ క్రమబద్ధం అయితే, ఏకంగా మన శరీరమే క్రమబద్ధం అవుతుంది. ఒకసారి ఈ నాలుగు అంశాలూ ఒక దిశగా క్రమబద్ధం అయితే చాలు. అప్పుడింక మనం కోరుకునే దాన్ని అవలీలగా సృష్టించగలుగుతాం. దానికో రూపం ఇవ్వగలుగుతాం. అందుకు మన సామర్థ్యం, ఒక తార్కాణంగా ఉంటుంది. అప్పుడు మనమే ఎన్నో విధాలుగా సృష్టికర్తలం అయిపోతాం. అందుకని, ఒక స్పష్టమైన ఆలోచనతో ' ఈ రోజు నేను ఎక్కడికి వెళితే అక్కడ, ఒక శాంతిభరితమైన, ప్రేమపూర్వకమైన ప్రపంచాన్ని సృష్టిస్తాను!' అనుకుని ముందుకు సాగండి.
- సద్గురు jaggi vaasudev