500 మార్కులుతెచ్చుకున్నారు కానీ ఆస్థాయిలో సంస్కారాలు లేని ఈ చదువులెందుకు ?

500 మార్కులు తెచ్చుకుంటున్నారు కానీ ఆ స్థాయిలో సంస్కారాలు పెంచలేని ఈ చదువులెందుకు ?

నిన్న పండుగకు పిల్లలు ఇంటికొచ్చారు. మా చిన్నవాడు నూజివీడులో iiit లో మూడవ సంవత్సరం లో కొచ్చాడు . పిల్లలు వాళ్ల చదువులు కాలేజీ ల విషయాలు మాట్లాడుతూ చెప్పిన ఒక సంఘటన మనసును వికలం చేసింది . వాళ్ల కాలేజీలో జూనియర్ అయిన ఒక పిల్లవానికి తండ్రిలేడు ,తల్లి కష్టపడి చదివిస్తున్నది. పిల్లవాడుకూడా బాధ్యతగా చదువుకుంటూ మంచి మార్కులు తెచ్చుకుని త్రిబుల్ ఐటిలో సీటు తెచ్చుకున్నాడు . మొన్న వీడు చెల్లించవలసిన ఫీజు నిమిత్తం వాళ్లమ్మ ఏడువేలరూపాయలు పంపినదట . కూలికెళ్ళి సంపాదించిన డబ్బది .బిడ్దకోసం ఆతల్లి ఎంత శ్రమపడిందో ! మిగతా డబ్బును పంపుతానని అంతవరకు ఇక్కడుంటే ఖర్చవుతాయి నీదగ్గరే జాగ్రత్తగా ఉంచుకోమని పంపినదట . వాడు చాలా జాగ్రత్తగా భద్రపరచుకున్నాడు . వాడు క్లాసులో ఉన్నప్పుడు తోటి స్టూడెంట్ ఎవడో వాడి రాక్ తాళం ఎలా తీశాడొ గాని తీసి డబ్బు కాజేశాడు . పాపం ఆపిల్లవాడు వచి ఒకటే ఏడ్వటం . హాస్టల్ పర్యవేక్షక ఉద్యోగులు కూడా మేమేమి చేయగలం ? మీ లోనే దొంగలుంటే !అని నిస్సహాయత వ్యక్తం చేశారట . మా అమ్మ ఎంత కష్టపడితే ఈ డబ్బుపంపినదో అన్నా ! అని ఏడుస్తున్నాడట వాడు .
నాన్నా వాడికి ఇంటికెళ్లటానికి కూడా డబ్బులు లేవు . మా ఫ్రెండ్స్ అందరం కలసి మూడువేలువసూలు చేసి వానికిచ్చాము . ఇంటికెళ్లటానికి చార్జీలు కూడా ఇచ్చిపంపాము అని మావాడు చెబుతుంటే నాచిన్నతనాన బీసీ హాస్టలో ఉండి చదువుకున్నరోజులు గుర్తొచ్చాయి .
వాళ్లరూమ్ లో వాల్లలో ఒకడు క్లాసుమధ్యలో బాగాలేదని లేచి వచ్చాడట ఆరోజు . మాకు వాడి మీద అనుమానం . పండుగ రోజుకల్లా వాడి డబ్బు వాడి దగ్గరపెట్టకపోతే తరువాత కంప్లైంట్ చేసి సంగతి తేలుస్తామని వాళ్లరూమ్ కెళ్ళి వార్నింగ్ ఇచ్చివచ్చాము నాన్నా అని చెప్పాడు మావాడు.

ఇక్కడ ఆలోచించాల్సిన విషయం . ఈ కాలేజీలో సీటురావాలంటే పదవతరగతిలో ఐదు వందల మార్కులపైన రావాలి.మేం చదువుకునేప్పుడు అన్ని మార్కులంటే అవిసంపాదించినవాడు అసాధారణ విద్యార్థి అనుకునేవారు.ఇప్పుడు అలాంటి పిల్లలు బాగాపెరిగారు. అంటే ఆస్థాయిలో మార్కులు తెచ్చుకున్నవాడు అల్లరి చిల్లరగా తిరిగేవాడు కాదు . బాగా చదివేవాడే .మరి ఇంత కష్టపడి చదివేవానికి ,దేన్నైనా నిజాయితీగా మాత్రమే పొందాలనే మంచిసంస్కార వంతమైన ఆలోచనలు ఎందుకబ్బలేదు ? పరాయి సొమ్ము దోచుకోవటం పాపమని ఎందుకు అనిపించలేదు ? తనదొంగతనం వలన ఎదుటివానికి ఎంత బాధకలుగుతుందో ఆనే ఆలోచన ఎందుకు రాలేదు ? పోగొట్టుకున్నవాని దు:ఖాన్ని చూసైనా ఎందుకు బాధ కలగలేదు ? ఐదువందల మార్కులు సాధించగల శక్తిని ఇచ్చిన మన విద్యావ్యవస్థ సాధారణ మానవత్వాన్ని ఎందుకు పెంపొందించలలేకపొతున్నది ? ఒక ఉపాధ్యాయునిగా నా వృత్తిలో ఉన్న లోపాలేమిటి ? ఈ ఆలోచనలు నన్ను నిదురపోనివ్వటం లేదు . ఏడుస్తున్న ఆపసివాని మొహం కళ్ళుమూస్తే అస్పష్టంగా కనిపిస్తూ ఆందోళన కలిగిస్తున్నది.
ఇంతమంది విద్యార్థులను పాస్ చేస్తున్న మేము [ఉపాద్యాయులందరము] ఎందుకిలా సంస్కార హీనులుతయారయ్యేలాచేసి ఫెయిల్ అవుతున్నాము ? ఇది మా తప్పిదమేనా ?

[ఇక్కడ నా పరిశీలనలో స్వీయ అనుభవాన్ని గుర్తు తెచ్చుకుంటున్నాను . నిరుటిదాకా మన పీఠం తరపున నడిపిన పాఠశాల కు చుట్టుపక్కల పది గ్రామాలనుంచి పిల్లలు వచ్చేవారు . సాధారణంగా చిన్నచిన్న దొంగతనాలు తప్పులు చేసే పిల్లలు ఒకరిద్దరుంటారు ఎక్కడైనా . కానీ వీళ్లలో ఒక ఊరినుంచి వచ్చే పిల్లల్లో ఎక్కువమంది దొగతనం అంటే భయం లేనివాళ్ళు .దొరికినా తిట్టినా సిగ్గుపడనివాళ్ళు .ఆవకాశమొస్తే పెన్నులు పెన్సిల్లేకాదు బ్యాగుల్లో డబ్బు కూడా తీసేవాళ్లు ఎక్కువమంది కనపడేవారు . వీళ్ళేం లేనివాళ్లు కాదు వేరేప్రాంతం నుంచి మా ప్రాంతానికొచ్చి బీళ్ళను సస్యస్యామలం చేసిన రైతులు .బాగా సంపాదించినవాల్లే . వీళ్ల తోటివారు కొదరు మరికొన్ని గ్రామాలవాల్లున్నారు ఆపిల్లలు మాత్రం దొంగతనం లాంటివంటె భయపడతారు . ఎన్ని నీతి కథలు చెప్పినా ? తప్పుచేయటం పాపమని ఎంత చెప్పినా అవకాశం వస్తే మాత్రం వదలరు అని నిరూపితమైనది . ఇంకా లోతుగా పరిశీలిస్తే వీళ్ల ఊర్లోకి కూరగాయల బండివాడుగానీ ,ఏదైనా సామాన్లమ్ముకునే వాడుగానీ వెళ్తే కొందరు బేరమాడుతుంటెనే మరికొందరాడవాళ్ళు కాయలు, సామాన్లు కొంగుచాటుగా సర్దుతారని ఆవ్యాపారస్తులు తిట్టుకోవటం విన్నాను. పిల్లలు చెప్పుకుంటుంటేకూడా విన్నాను .]

ఇలా దొంగతనాలు చెడుపనులు అలవాటైవాడు బాగాచదువుకుని మంచి మార్కులు తెచ్చుకుని ఉద్యోగం సంపాదించినా వాని ద్వారా సమాజానికి జరిగేదేమిటి ? మార్కులుపెంచటమే తప్ప మానవత్వాన్ని పెంపొందించలేని మా విద్యాబోధనెందుకు ? ఇక్కడ ఫెయిల్ అవుతున్నది మేమే[ఉపాద్యాయులం]నా లేక మిగతావారికి బాధ్యతుందా ? దీని పరిష్కారానికి మార్గమేమిటి ? ఏ వ్యవస్థ ఫెయిల్ అయినా ఇబ్బమ్ది లేదు కానీ గురువులు ఫెయిల్ అయితే సర్వనాశనమేనని నమ్మే వాడిని నేను . పండుగరోజుకూడా మనశ్శాంతి లేకుండా ఆలోచిస్తూ గడుపుతున్నాను నేను పాస్ అవ్వగాలనా అని ................