కొత్తకోడల్లూ ! కాస్త అత్తకాపురం కూడా చేయండమ్మా

మాస్టర్ గారండీ ఇంట్లో తలనొప్పయిపోయింది . మా అమ్మ బీపీ పెరిగినట్లు అరుస్తుంది వచ్చి కంప్లైంట్ చేశాడు .,మా శిష్యుడు అంజిరెడ్డి .

అదేమిట్రా పెళ్లయి పది రోజులు కాలేదు అప్పుడే గొడవేమిటి కొత్త కోడలి ముందు ? వాళ్లటీచర్ గారు [మా ఆవిడ ] అంది .

అదేనండి పెద్దగా అరుస్తుంటే ఎందుకలా అని నేను ఎదురు మాట్లాడితే ఇంకా ఎక్కువచేస్తుంది . నాకళ్ళముందు వద్దు వెళ్ళిపో అంటుంది . ఇది చూసి ఆ అమ్మాయి [వాడి పెళ్లాం] ఏడుస్తుంది .,నేనొచ్చాక మీ ఇంట్లో గొడవలనుకుంటారు చూచేవాళ్ళు అని ,వాడు చెప్పుకుపోతున్నాడు .

అయ్యో ! ఏవిటండి ఆవిడ చాదస్తం మీ రెళ్ళి కాస్త కేకలేసి రండి .... మా ఆవిడ స్వరం లో వాడిపై సానుభూతి పెరుగుతున్నది .
నువ్వాగు ..... వాడిని అసలు విషయమ్ బయట పెట్టనీ ముందు .......నిలువరించాను మా ఆవిడని .

ఒరే ఈ కథలు ఆపి అసలు సంగతేమిటో చెప్పు . పెళ్లయి పది రోజులకే మీ అమ్మగారు నీమీద ఇంత కోపపడటానికి
కారణమేమిటంటావు ? ఏంజరిగింది అడిగాను వాడ్ని .

ఏం లేదు సార్ ! మేము హైదరాబాద్ వెళ్లటం ఇష్టం లేదు . ఇక్కడే ఉంటే అక్కడ ఉద్యోగం పోతుంది . నేను ఇక్కడ ఉండి ఏంచేయాలి ? ఉద్యోగం కోసం అక్కడకు వెళ్ళేప్పుడే చెబి్తే మానుకునే వాడ్ని కదా ? ఇప్పుడు మాకుంది నువ్వొక్కడివి ? నువ్వు వెళ్లిపోతే ? మే మెలా ? నిన్నొదిలి పెట్టి ఉండలేం . అని ఏడుస్తుంది మా అమ్మ మా నాన్నేమో ఏమీ మాట్ళాడడు . నేను ఉంటానని చెప్పలేదని .అదిమనసులో ఉంచుకుని అన్నింటికీ విసుక్కుంటుంది .ప్రతి దానికీ విపరీతార్ధాలు తీసి. తగవు పెట్టుకుంటుంది..అసలు విషయం బయటపెట్టాడు .

ఒరే అంజీ ! నువ్వు వాళ్లకు ఒక్కగానొక్క కొడుకువు . ఆడపిల్లంటే పెళ్ళిచేసి ఒక అయ్యచేతిలో పెట్టిపంపారు .అది సహజం కాబట్టి తట్టుకున్నారు . వాళ్ల ఆశలంతా నీమీదే .నువ్వు అప్పుచేయమంటే చేశారు . చేసిన పనుల్లో నష్టమొచ్చి డబ్బు పోగొట్టినా పల్లెత్తుమాటనలేదు . నువ్వు విజయవాడ హైదరాబాద్ లు తిరుగుతూ హాయిగా ఉంటే ఇక్కడ రేయనకా పగలనకా కష్టపడుతూ పొలంగొడ్డూ గోదా చూసుకుంటూ నీకు డబ్బు అందించారు . పెళ్ళివిషయం లోకూడా నీమాటమీదే నడిచారు . ఇప్పుడు పెళ్లయి పది రోజులకే వెళ్ళిపోతానంటే ! వాళ్లబాధ ఎలా ఉంటుందో ఆలోచించు . ?
అదీ పెళ్ళిచేసుకుని పెళ్లాం వెంటబెట్టుకుని వెళుతుంటే తమనుంచి దూరంగా వెళ్లిపోతున్నావని వాళ్లెంత వేదనపడుతున్నారో అర్ధం చేసుకున్నావా? అడిగాను వాణ్ణి .

పెళ్ళయ్యాక ,హైదరాబాద్ వెల్లి అక్కడేఉడాల్సొస్తుందని ముందే చెప్పానండి ...వాడు వివరణ ఇవ్వబోయాడు.

బిడ్డ హాయిగా బ్రతకాలని ప్రతి తల్లిదండ్రికి ఉంటుంది . కానీ తనముందే బిడ్డలు తిరుగుతూ ఉండాలని గాఢంగా ఉంటుంది .నాలుగు రోజులాగాక ఉద్యోగం కదా .పిల్లలు వెళ్లకపోతే ఎలా ? వాళ్ల ఎదుగుదలను అడ్డుకుంటె ఎలా ?అనే ఆలోచన వచ్చాక వాల్లే పంపుతారు . నువ్వు పెళ్ళికాకముందే అక్కడ ఇళ్ళు అద్దెకు మాట్లాడుకుని వచ్చావట కదా ! [ఈవిషయం వీడి ఫ్రెండ్ మాలకొండారెడ్డి నాకు మొన్ననే చెప్పాడు] పెళ్ళిచేసుకోగానే ఇక నీవు నీగురించే ఆలోచిస్తావా ? తల్లిదండ్రులు ఏమంటారో ? వాళ్ల అభిప్రాయమెలా ఉంటుందో తెలుసుకునే పనిలేదా ?
అసలు వచ్చిన కొత్తకోడలు ఇంట్లో అత్తామామా అంటే గౌరవం భక్తి పెరగాలంటే కొంతకాలమన్నా అత్తగారి పర్యవేక్షణలో కాపురం చెయ్యాలి . అప్పుడే కదా తన భర్తవైపున ఎవరెవరు? .ఎలా ఎవరిని గౌరవించాలి .అత్తమామలను ఎలాచుసుకోవాలి ? కుటుంబ గౌరవమర్యాదలను తాను ఎలా కాపాడుకోవాలి అని నేర్చుకునేది ? పెళ్లికాగానే ఎవడి పెళ్లాన్ని వాడు చంకనేసుకుని వెళ్లిపోతే మరి వాళ్లసంగతేంటి ? ఇప్పుడే ఇలా ఉన్నారు ,రేపు కాళ్ళుచేతులు ఉడిగాకైనా తమ మంచి చెడ్డా చూస్తారా ? అని మీ తల్లిదండ్రులు బాధపడరా ? ఇవేం ఆలోచించలేదటరా అడ్దగాడిదా .....[ నాస్వరంలో కాస్త తీవ్రత పెరగగనే మావిడ అడ్డుకుంది]

మీరుండండి . ఇప్పుడు వాడు చిన్నపిల్లాడు కాదు . పెళ్లయినవాడు అలా తిడతారేంటి ? పిల్లలకసలే మీరంటే భయం . ఈసారి ఇటువైపుక్కూడా రాడు వీడు ,,నేను చెబుతాలే మీరెళ్లండి పూజకు టైమయింది అని మధ్యలోఆపింది నన్ను.

సర్లే నేను చెప్పింది అర్ధం చేసుకో అని చెప్పి గుడిలోకి వెళ్లాను సాయం సంధ్యాహారతి సమయం అవటం తో .

నిన్నరాత్రి ఏదో పనిఉండి వానికి ఫోన్ చేశాను . సార్ !నేనిప్పుడు హైదరాబాద్ లోఉన్నానండి...... వాడినుండి సమాధానం .
ఎప్పుడెల్లావురా ?

మొన్నరాత్రి వచ్చానండి. మీరడిగిన వస్తువు మీకు పంపమని అమ్మావాల్లకు చెప్పివచ్చానండి . మాఆవిడదగ్గరే ఉందది పొద్దుటే పంపమని ఫోన్ చేసి చెప్పానుకూడా ........వాడు చెప్పుకు పోతున్నాడు.

వెరీగుడ్ ......... [పరవాలేదు వీడు ఇంకా పెద్దల మాటంటే గౌరవం చూపుతున్నాడు .సంతోషం వేసింది నేచెప్పిన చదువు వీడికి కాస్త ఒంటపట్టింది . భార్యను తల్లీదండ్రులదగ్గరే ఉంచి వెల్లాడు .] ఎలాగూ నాలుగు రోజులాగాక అక్కడ పిల్లవాడు తిండి తిప్పలకు ఇబ్బంది పడుతున్నాడని కోడల్ని వాల్లే హైదరాబాద్ పంపుతారు . ఈలోపల వాల్లమురిపెంకూడా తీరుతుంది . ఎటునుంచి సమస్య ఉండదు .

కాబట్టికొత్తగా కాపురానికొచ్చే ఆడపిల్లలకు నేను చెప్పేదేమిటంటే . ముందు మీ అత్తామామలను గౌరవించండి . అత్తగారింట్లో అడుగు పెట్టారంటే ఆకుటుంబగౌరవప్రతిష్టలను కాపాడే బాధ్యత మీరు తలకెత్తుకున్నారని గుర్తుంచుకోండి . మీకుటుంబమంటే కేవలం భర్త,మీకు పుట్టబోయే పిల్లలేకాదు ,అత్తా మామా ఆడపడుచు లు బావలు మరుదులుకూడా
వీళ్లందరి ఆప్యాయతలను ప్రేమలను మీరు పొందాలంటే పెద్దపనేంకాదు ,కాస్త వినయంగా వాళ్లను గౌరవించండి చాలు .
ముందుగా అత్తామామలు చెప్పినట్లుగా వింటూ వాళ్ల అనుమతితో ఏపనైనా చేయండి చాలు .అబ్బా ! మా కోడలు బంగారం అని మురసిపోతారు. అంతేగాని మనమెప్పుడు వేరే వెళ్ళెది అని ఆలోచించకండి . మన సుఖమంతా త్యాగం లోనే ఉంది ఒకరికోసం ఒకరం తమ సుఖాలను పక్కనపెట్టి ఆలోచించే కుటుం వ్యవస్థ మనది . మంచైనా చెడైనా కలసి పంచుకునే వ్యవస్థ మనది . ఇంత కుటుంబం ,ఇంతమంది అప్యాయత దొరకటం కుటుంబ పరంగా మీకు గొప్ప బలం .రేపు ఏసమస్యవచ్చినా అండగా నిలబడేది వీళ్ళే .
కాకుంటే అత్తగారు కాస్త చాదస్తంగా అనిపించవచ్చు. ఎందుకంటే చిన్నతనం నుంచి అమ్మా ! అమ్మా ! అంటూ కొంగుపట్టుకు తిరిగిన కొడుకు ఒక్కసారిగా పెళ్లాణ్ణే అన్ని విషయాలూ అడుగుతూ ఉంటే బిడ్డను తననుంచి దూరం చేస్తున్నది ఈ అమ్మాయి అనే భావన వస్తుంది మొదట్లో ఏ తల్లికైనా . అది సహజం . ఇక్కడే మీరు కొద్దిగా సహనం వహించి తెలివిగా [మా ఆయనకెదిష్టమో నాకు తెలుసు అనుకోకుండా ] అత్తయ్యా ! మీ అబ్బాయి కేది్ష్టం ? ఏంచేయమంటారు ? ఈపని చేయమంటారా ? మా అమ్మానాన్నావాళ్ళు మీగూర్చే చెప్పేవాల్లు వాల్లత్తగారు చాలా మంచిదని . ఇలా కాస్త వాల్లు సంతోషపడేలా మాట్లాడండి చాలు . మీ ఇల్లు స్వర్గమే . ఆదిక్కుమాలిన టీ్వీ లలో చెత్తసీరియల్ లోలాగా ఉండరు అత్తా కోడల్లు .ఒకరిమీద ద్వేషం చూపాల్సిన అవసరం లేదు .

తమపిల్లల సంతోషంగా ఉండాలనే ఆడపిల్లల తల్లిదండ్రులు కూడా అల్లుడికి మీ అమ్మా నాన్నలనడుగు బాబూ అని సలహా ఇవ్వండి . అంతేగానీ ఏమిటీ టౌన్లో కాపురం పెడతారా ? ఏం పరవాలేదు .ఏదన్నా ఇబ్బందయితే మేము సర్దుతాములే డబ్బు ....అని వేరు కాపురానికి ప్రోత్సాహం ఇవ్వకండి . ఏమిటమ్మాయ్ మీరు అందరికీ అడ్డమైన చాకిరీ చేయాల్సిన పనిలేదు . అని పెళ్లికి ముందే ఆడపిల్లలకు నూరిపోయకండి . అమ్మా అత్తగారింట్లో ఎంత మంచి పేరు తెచ్చుకుంటే మనకుకూడా అంతవిలువ అని బోధించండి . అత్తగారింట్లో గుట్టుమట్లన్నీ ఎవరికీ చివరకు కన్నవారికి కూడా ప్రతి విషయం చెప్పాల్సిన పనిలేదని సలహా నివ్వండి . లేకుంటే వాల్ల బాధేమిటో రేపు మీకు కోడలొచ్చినప్పుడు తెలుస్తుంది .
మన ఇంటి కొచ్చిన కోడలు మన కూతురులాంటిదే కనుక కూతురు సుఖం గూర్చి ఎలా ఆలోచిస్తామో ,కోడలివిషయం లోనూ అలానే ఆలోచించాలి అత్తామామ కూడా >
కాబట్టి అమ్మయిలూ పెళ్లయిన కొత్తలో ఒంటరిగా భార్యభర్తలు ఉండాలనుకోవద్దు . అత్తకాపురం మీకు జీవితంలో ప్రతిసమస్యను ఎదుర్కునే శిక్షణ నిస్తుందని నమ్మండి . అత్తకాపురం చేయండి . మీ జీవితాన సకలశుభాలు కలగాలని ఆశీర్వదిస్తున్నాను