ఓరి ! మీ కెరీర్ కాశీకెళ్ళా ,! ముందు పెళ్ళిచేసుకోండినాయనా ! పెళ్ళికాని ప్రసాదులూ .

ఈకాలం లో చదువులమీద ,కెరీర్లమీద పిల్లకాయలకు శ్రద్ధఎక్కువైపోతుంది. జీవితంలో ఎదగాలనుకుని ఎంతో కష్టపడుతున్నారు . హార్డ్ వేర్లు షాఫ్ట్ వేర్లు .ఎమ్సీఏలు .ఎమ్బియ్యేలూ ఒకదానితరువాత మరొకటి చదువుతూనే ఉన్నారు. ఎప్పటికప్పుడు కొత్త కొర్సులు రావటం పోటిప్రపంచంలో వెనుకబడగూడదనుకుని బాగా చదువుకుంటున్నారు . కెరీర్లో పైకిపైపైకి ఎదగాలనుకుని అలుపెరుగక శ్రమిస్తున్న కుర్రాళ్లను చూస్తుంటే ముచ్చటేస్తున్నది. కానీ జీవితంలో అతిముఖ్యమైన విషయాన్ని నిర్లక్ష్యం చేస్తున్నారనిపిస్తున్నది .ఈడబ్బు ,కెరీర్ తరువాత వస్తాయేమోగాని వయస్సురాదుకదా ! అందుకే కుర్రాళ్లకు రెండుముక్కలు చెబుదామని పిస్తున్నది .

ఈమధ్య మా బంధువులమ్మాయికి ఒక సంబంధం వచ్చింది కుర్రాడు చాలామంచోడు . ఢిల్లీలో ఏదో సాఫ్ట్వేర్ కంపెనీలో నెలకు ఎనభైవేలదాకా సంపాదిస్తున్నాడట . అన్నీ బాగనే ఉన్నాయి కుర్రాడుకూడా గడబొంగులా ఎత్తుగాఉన్నాడు అంతవరుకూ బానే ఉంది . వయసు మాత్రం 38 దాకా ఉన్నాయి . ఇప్పటిదాకా చదువు మీద దృష్టిపెట్టటం వల్ల పెళ్ళి గూర్చి ఆలోచించలేదట. వీల్లు మొత్తం అయిదుగురు సంతానం వీళ్లనాన్నగారు అటెండర్ గా పనిచేసేవారు .ఎప్పుడు ఆన్లైన్లో ఉండేవాడుకూడానట . కాబట్టి కష్టాల్లో పెరిగారు కనుక చదువుమీద .ఉద్యోగాలపైన దృష్టి పెట్టటం వలన అందరికీ లేట్ మారేజ్ లే . పాపం ఈ కుర్రోడు ఆఖరివాడు . ఇక ఈ పిల్లోడ్నిచూసినకాడనుండి అమ్మలక్కలంతా బాగాముదిరిపోయాడు .ఇంతకాలం పెల్లెందుకు కాలేదో ? ఏదో ఉండి ఉంటుంది . అయినా వయస్సంతా అయిపోయాక ఈపిల్ల ఏం సుఖపడుతుంది ? అని మెటికలు విరవటం ఆ అమ్మాయి తల్లిదండ్రులకు కూడా ఇంతవయస్సయినవాడికి పిల్లనివ్వటం బాలేదనిపించి సంబంధం వద్దనుకున్నారు.

ఇలా ఇక్కడ అంతర్జాలం లో పరిచయమైన కుర్రాల్లుకూడా బాగా చదువుకుంటున్నారు . ఇలా సదువుకుని, సదువుకుని అసలు సమస్యను గుర్తించటం లేదు . ఏవయస్సుముచ్చట ఆవయస్సులో జరగాలంటారు పెద్దలు . ధర్మార్ధకామమోక్షాలు వరుసలో సాధించాలి . అందుకు వైవాహిక జీవితం చక్కని బాట. మనిషికి డబ్బుకంటే విలువైనది జీవితం . ఏది సాధించిన ఏస్థితిలో ఉన్నా ,అభినందించి అండగానిలచి సంతోషాన్ని పంచేది జీవిత భాగస్వామే. అదీగాక సరయిన వయస్సులో పిల్లలు పుడితే శరీరం లో ఓపిక ఉన్నప్పుడే బరువులు బాధ్యతలను అలఓకగా నిర్వహించగలుగుతారు. బాగా ముదిరి పోయాక పెళ్ళిచేసుకున్నా సంసారజీవితంలోమాధుర్యాన్ని సంపూర్ణంగా అనుభవించలేరు. పెద్దవయస్సులో పుట్టే పిల్లలు పెద్దయ్యేసరికి వీల్లుపెద్దవాళ్లయి పోయి బాధ్యతలు పెనుబారమవుతాయి .

పెళ్ళిచేసుకుంటే చదువు సాగదు. కెరీర్ లో ఎదగలేమనుకోవటం భ్రమ . మనోసంకల్పం ఉంటే అవేమీ ఆటంకాలు కావు. పైగా సహకారాన్నికూడా అందిస్తుంది కుటుంబం . కేవలం చేతినిండా డబ్బు .ఇంటినిండా వస్తువులుంటేనే సుఖసంతోషాలుంటాయనే అపోహ వదలండి . సంతోషం అనేది మనమనస్సుకు సంబంధించింది . కెరీర్ నిర్మించుకోవడం అవసరమే . కానీ జీవితాన్ని సద్వినియోగం చేసుకోవడం కూడా ముఖ్యమే. అది మరువవద్దు.

నాకుతెలిసి ఇలా వయస్సు బాగాపెరిగినదాకా పెళ్ళిగూర్చి ఆలోచించని ఆడ ,మగ పిల్లలు మానసికంగా చాలావత్తిడికి గురవుతున్నారు . పెళ్ళివిషయంలో వారి తల్లిదండ్రులు వేదనకు గురవుతున్నారు. మనవల్లు మనవరాల్లతో గడుపుతున్న మిగతావారినిచూసి తమకా అదృష్టం ఇంకారాలేదని కుమిలిపోతున్నారు .
కాబట్టి మీరు మీకుదక్కాల్సినది ఎక్కడికీ పోదు. అలాగని సోమరులుగా కూర్చోమని కాదు . మీ జీవనయాత్రకు జీవితసహచరి తోడేగాని కీడుకాదు .

కాబట్టి నేను చెప్పేదేమిటంటే ఇరవై మూడునుంచి ఇరవైఅయిదుదాకా వేచిచుసినా పరవాలేదుగాని ఇకపై ఆలస్యం చేయకండి .ఈ మందులతిండితినే ఈరోజులలో ఆరోగ్యం.ఆయుష్శు చాలాతక్కువ .గమనించండి . అలాకాక బాగాచదువుకుని చదువుకుని , బాగాసంపాదించటమే ముఖ్యమనుకుంటే చేతినిండా డబ్బు గాడితప్పితే వంటినిండా జబ్బుమాత్రమే మిగులుతాయి. కాబట్టి పెళ్ళికాని ప్రసాదులూ ....................త్వరగా వైవాహిక జీవితాన అడుగుపెట్టండి .మీజీవితం పుష్పించి ఫలించి సుఖసంతోషాలతో సాగాలని కోరుకుంటున్నాను .
మాకుర్రాళ్లంతా ఇది చదువుతున్నారని తెలుసు . కాబట్టి త్వరగా పెళ్ళిపిలుపులు వస్తాయని అనుకుంటున్నాను .