మనసెందుకు కోరుకోదు? ! మహాదేవుని లోకము

ఉద్ధవుడు శ్రీకృష్ణభక్తుడు. శిష్యుడుకూడా . ఒకనాడయన శ్రీకృష్ణపరమాత్మనిలా అడిగాడు. దేవా ! మీరు సర్వశక్తి సంపన్నులు .తృటిలో ఏకార్యమునైనా చేయగలుగుదురు. నాచుట్టూ గల ఈ ప్రపంచం లో జనులందరును,ప్రాణులందరును అనేకమైన దు:ఖములకు,బాధలకు గురిఅగుచున్నారు. ఈ సమస్త ప్రాణులను మీ నిజధామమునకు ఎందుకు తీసుకుని పోరు ? మీరు కనికరించిన వీరందరు అచట శాస్వతానందమును పొందుదురుగదా ! దయాళువైన మీరు ఏల ఉపేక్షచేయుచున్నారు ? అని ప్రశ్నించెను. అదివిని శ్రీకృష్ణులు మందహాసము చేస్తూ "ఉద్ధవా! నేనలాగే కోరుకుందును కానీ వారు వచ్చుటకు ఒప్పుకోరు.

అదేమిటి ! దేవా ! మీరన్నది నమ్మలేనిది. అందరూ ఒప్పుకుంటారని నానమ్మకము. అని ఉద్ధవుడనెను. సరే ! అయితే అన్నింటికంటే నికృష్టమైనది పంది జన్మ . నాతో వచ్చుటకది ఒప్పుకునునేమో అడిగిచూడు అన్నాడు ఆలీలానాటక సూత్రధారి. ఉద్దవునికి నిజమే అడిగిచూడాలనిపించినది.

" ఈభూమికంటే ఏంతో ప్రశాంతము ఆనందముగానుండెడి పరంధామమునకు నిన్నుగొని పోయెదను వచ్చెదవా? అని అడిగాడు ఉద్దవుడు పందిని.

అది ఉధ్ధవుని శంకిస్తూచూసింది. "నేనిచ్చట తినునట్టి మలము మొదలగు ఆహారములచ్చట దొరుకునా ? అడిగింది.

ఛీ ! లేదు. నీకు తినుటకు అచట దివ్యమైన అమృతము దొరుకుతుంది . అత్యంత రుచికరంగా ఉంటుంది అని ఉద్దవుడన్నాడు.

" నాకిది అనుమానం గా ఉన్నది . ఇచట లభించెడి మలము కన్న రుచిగల పదార్ధమింకేదైనా ఉండునా? ఎన్నటికీ ఉండదు. ఫో ! ఫో ! నాకు నీ పరమాత్మ వద్దు ఆధామము వద్దు. నీ అమృతము నాకక్కరలేదు. నాకు ఇక్కడ ఉండటం రుచికరమైన ఈ ఆహారమే ఇష్టము . " అని పంది తన నిర్ణయమును తెలిపెను. ఉద్ధవుడు మారు మాటాడక వెడలి పోయెను.

అనగా ప్రాపంచిక కోర్కెలను వదలి భక్తిమార్గములో ప్రవేశించాలంటే భౌతికసుఖాలకు అలవాటుపడ్డ మనసుకు చాలాకష్టము గా ఉంటుంది .అందువల్ల వాటిని వదలాలంటె ఒప్పుకోదు.