ఏమిటీ ప్రాణాయామం? ఎందుకింత ప్రాధాన్యత.?

ప్రస్తుతం ప్రాణాయామం అనే మాటను వినని వారు సాధారణంగా వుండరనుకుంటాను. పలు సంస్థలు పలుచోట్ల శిక్షణలను నిర్వహించడం, ప్రచారం జరపటం మూలంగా అందరికీ ఈమాట తెలిసింది. గతములో అయితే ఏ గుళ్ళోకి వెల్లినప్పుడో ,పెళ్ళి,శుభకార్యాలప్పుడో అయ్యవారు. ముక్కుపట్టుకో నాయనా, గాలిపీల్చుకో నాయనా అని చెప్పటం మనకు అర్ధం కాకున్నా తంతులాగా ముగించటం జరిగేది. ఇప్పుడు దీనివిలువ తెలిశాక అప్పుడు నవ్విన వాళ్ళే నేర్చుకోవడానికి పరుగులు

మనిషి జీవనానికి ఆధారం ప్రాణవాయువు[ఆక్సిజన్] ను మనం ఎంత ఎక్కువగా తీసుకోగలిగితే మనశరీరవ్యవస్థ అంత సమ్ర్థంగా పనిచేస్తుంది. దీనికవసరమయిన శ్వాస క్రియ అసంకల్పితంగనే జరుగుతుంది. దీనివలన మనం 500 మి.లీ. గాలిని మాత్రమే తీసుకోగలుగుతాము. కానీ మన ఊపిరితిత్తులకు రెండున్నరలీటర్ల గాలిని తీసుకోగలిగే అవకాశం ఉంది. మనం సంకల్పించి పూర్తిగా గాలిని తీసుకోవాలనుకుంటే 5 లీటర్ల గాలిని పీల్చవచ్చని వైద్య నిపుణులు అంగీకరిస్తున్నారు. సంకల్పించి పూర్తిగా గాలిని పీల్చటం[పూరకం,] దానిని వీలైనంత సేపు అక్కడ నిలిపిఉంచగలగటం[కుంభకం] పూర్తిగా గాలిని వేలైనంత ఎక్కువగా బయటకు వదలటం[రేచకం] ప్రక్రియ లనే క్రమబధ్ధమయిన పద్దతిలో మనవాళ్ళు చేసి సత్ఫలితాలు సాధించి మానవాళికి అందజేశారు. రోజూ పది పదిహేను నిమిషాలపాటు దీన్ని ఆచరించటం వలన అప్రయతనం గా మనం చేసే శ్వాసక్రియలో ఒకటిన్నర లీటర్ చొప్పున గాలి లోపలకు బయటకు నడుస్తుంది. దీ నిప్రభావం రోజంతా ఉంటుంది.
శ్వాస క్రియ ద్వారా మనం పీల్చే గాలి పరిమాణం పెరిగితే జీవకణాలకు ఆక్సిజన్ ఎక్కువగా అందుతుంది. జీవకణాలు శక్తివంతమవుతాయి,అవిశక్తివంతమయ్యాయంటె ఆరోగ్యంగా వున్నట్లే. ప్రాణాయామంతో పాటు శరీర కండరాలు కూడా బాగా బిగించటం వదులు చేయటం ద్వారా శక్తివంతం చేయవచ్చు. శరీర భాగాలను పైకి క్రిందకు పక్కకు కదిలిస్తూవుంటే శక్తిని పొందుతాయి. ఆరోగ్యం కాపాడ బడుతుంది. దీనినే యోగాసనాలుగా మన మహర్షులు మనకందించారు. ఈనాడు ప్రముఖులైన వైద్యులంతా గాలిపీల్చండి, ఆరోగ్యంగా వుండండి. అని చెబుతున్నది ఇదే . కాకుంటే మన పూర్వీకులనుండి మన నిర్లక్ష్యం వలన నేర్చుకోకుండా వదలివేసిన సంస్కారాలను, కార్పొరేట్ గురువులవద్ద ఎ.సి.. గదులలో డబ్బులిచ్చి నేర్చుకునే దుస్థితికి వచ్చాం.
కనీసం ఇప్పుడయినా మన అచార వ్యవహారాలన్నింటిలో గల శాస్త్రీయతను అర్ధం చేసుకుని తరవాత తరానికి అందజేద్దా0.
అసలు మనిషి ఆయువు ఇన్ని సంవత్సరాలు అనికాక ఇన్ని శ్వాసలకాలం అని నిర్ణయించబడి వుంటుందట. తక్కువ శ్వాసలు తీసుకునే తాబేలు దీర్ఘకాలం బ్రతుకుతుంటే, వేగంగా శ్వాసలు తీసుకునే పాము, చాలా తక్కువకాలం బ్రతుకుతుందంటారు. మనలోకూడా వేగంగా శ్వాసలు తీసుకునేవారు అనారోగ్యాలతో బాధపడుతుంటారు. తక్కువసార్లుగా ఎక్కువ మొత్తమ్లో గాలిని తీసుకుని విడిచేవారు ఆరోగ్యంగా వుంటారు. గమనించి చూడండి. మరెందుకాలస్యం మనం మొదలెడదాం.... ఆరోగ్యకరమయిన భరతజాతిని భూమిమీద నిలుపుదాం.