కూరలో ఉప్పు తగ్గిందా !? రాష్ట్రం వల్లకాడవుతుంది జాగ్రత్త !

తెలుగుప్రజలు పరమ మూర్ఖులు అనే ముద్రపడిపోయేట్టుంది మనకు. ఏచిన్న సంఘటనకైనా విపరీతం గా స్పందించటం ఒళ్ళుకాలబెట్టుకుని ఇల్లుతగలబెట్టుకుని బజార్నపడటం సాధారణమైపోతుంటే ఇంతకంటే మరేమి గుర్తింపు పొందగలం ? . ఒకనాయకుడు మరణించినా , ధరలు పెరిగినా , జీతాలు తరిగినా ,అఫొహలైనా ,అనుమానాలున్నా ఉన్మాదం తో ఊగిపోతూ బస్సులు ,ఆస్తులు తగలెట్టుకునే పైశాచిక తత్వం ముదిరిపోతున్నది. ఎవడికి వాడు వీరుడైపోతున్నాడు ఉమ్మడి అస్తులను ధ్వంసం చేసి . ఇక రానున్న రోజులలో ఇంట్లో కూరలో కారం తక్కువైనా ,ఉప్పెక్కువైనా ఊరిమీదబడి ఏదికనపడితే దాన్ని తగలెట్టే మానసిక రోగ మహావీరుల సంఖ్య ఇబ్బడిముబ్బడిగా పెరిగిపోయే సూచనలు కనపడుతున్నాయి. ఇంట్లో పెళ్ళాం మీద ఎగిరితే ఏంజరుగుతుందో తెలుసుకనుక రాష్ట్రం వల్లకాడవుతుందని హెచ్చరించగల నాయకులు మనకు దిశానిర్దేశం చేస్తున్నారు మరి.దీనికి మందు ఒక్కటే.

స్వేచ్చ మరీ ఎక్కువై పోయింది మనకు . కాబట్టి ఈ ప్రజాస్వామ్య వ్యవస్థను రద్దుచేసి కొరడాపట్టుకుని పాలించే వ్యవస్థ కావాలి. తాడేపల్లిపల్లిగూడెం లో చింతపండు ధరపెరిగితే తాడిపర్తిలో ధర్నా చేయటానికి రోడ్డేక్కే అలవాటొచ్చేసిందికనుక ఇలాంటివార్తలను ప్రసారం చేసి ఈ ఉన్మాదాలను హీరోయిజంగా చిత్రీకరిస్తున్న ప్రసార మాధ్యమాలను రద్దుచేయాలి . రోడ్డెక్కిన వాణ్ణి ఎక్కినట్టు పిట్టల్లా కాల్చేయాలి . పనిస్తేనే ఆరోజు బువ్వ పెట్టే పథకంతో కొంతకాలం పాలించేస్తే అప్పుడు స్వేచ్చ కోసం అలమటించి దాని విలువతెలిసి అప్పుడు సక్రమంగా స్వేచ్చను వినియోగించుకుంటాము మనము . ఇంతకంటే మార్గమేమీ లేదనిపిస్తుంది. ఎన్నికలు, ప్రజాస్వామ్యాలు , మన ఒంటికి పడవని తేలిపోతూవుంటే ఇంకేమాసించగలం ? ఈ వ్యవస్థలనుండి.! అరమనిషిబలం ఆరుగురు మనుషుల ఆవేశం గల ఈతరం నుండి. !