అష్టోత్తరశతటపా [108]సమర్పయామి.[భరతమాత]

సగరమాంధాతాదిషట్చక్రవర్తుల
అంకసీమననిల్పినట్టిసాధ్వి
కమల నాభుని వేణుగాన సుధాంబుధి
మునిగితేలిన పరిపూత దేహ
కాళిదాసాది సత్కవికుమారులగాంచి
కీర్తిగన్న పెద్దగేస్తురాలు
బుద్ధాది మునిజనంబుల తపంబున
మోదభాష్పముల్ విడిచిన భక్తురాలు

సింధుగంగానదీ జలక్షీరమెపుడు
గురిని బిడ్డల పోషించుకొనుచున్న
పచ్చిబాలెంతరాలు మాభరతమాత
మాతలకు మాత సకలసంపత్సమేత.
ఇది మా వినుకొండ కవికోకిల గుర్రం జాషువా గారి కలమునుండి ,కంఠమునుండి జాలువారిన భరత మాత స్తుతి . నా బ్లాగును ఆదరించి న మీ అందరికీ ఏమి సమర్పించుకోవాలా అని ఆలోచిస్తుంటే, మా మహాకవి మదిలోకి వచ్చారు. నాకు ఇంటర్వ్యూలో కూడా మంచిమార్కులు తెచ్చి వుద్యోగమిచ్చిన పద్యమిది. వారికి నా కృతజ్ఞతలు తెలుపుకునే సందర్భం గాకూడా వుంటుందని భావించి మీకు వ్రాసి సమర్పిస్తున్నాను.
ఇక మొదలుపెట్టి న మూడున్నర నెలలలో 108 పోష్టులు వ్రాసి, 3880 మంది చూడగా 74 కామెంట్లను పొందిననేను మీఅందరికీ కృతతజ్ఞలను తెలుపుకుంటున్నాను. మన మహర్షులిచ్చిన ,మానవ వికాసానికి ,శ్రేయస్సుకు ఉద్దేశించబడిన విజ్ఞానాన్ని మీఅందరితో కలసి పంచుకునే చిరుప్రయత్నమ్లో నేనీ బ్లాగును ప్రారంభించాను. ఇందులో నాకు సహాయం చేసిన వారందరికీ నన్నుప్రోత్సహించిన వారెల్లరకూ మరొకసారి వినమ్రపూర్వక ధన్యవాదనులు.
ఇందులో మీఅందరికీ మేలుచేసేవి, మంచిని పంచేవన్నీ మనపూర్వీకులైన మహాత్ముల వలన లభించినవి. దోషముతో కూడినవీ, ఇతరులకు హానికలిగించేవన్నీ నాయొక్క..ఖచ్చితముగా నాయొక్క బుద్ధిహీనత వలన కలిగినవిగా పెద్దమనసుతో భావించగలరు. భగవద్భక్తులైన మీ ఎల్లరకూ ... ....భక్తజన పాద దాసుడు.
దుర్గేశ్వర