ఎల్ కేజీ నుంచే ఎమ్ సెట్ కోచింగ్ మనం ఎందుకివ్వలేకపోతున్నాము ?

ప్రస్తుతం విద్యారంగం లో చిత్రమైన పరిస్థితి నెలకొని ఉంది . ప్రతివారికీ ఎంతఖర్చు పెట్టైనానాసరే పిల్లలను మంచి చదువులు చదివించాలనే తపన ఎక్కువయింది . రిక్షావాడిదగ్గరనుంచి కోటీశ్వరుని దాకా ఈ మనోస్థితి ఒకేరకంగా ఉంది . ఒకరకంగా ఇది మంచి పరిణామమే . కాకపోతే ఈ తపన పరుగుగామారి , ఈపరుగు పందెం లో వ్యాపారవలయాలలో చిక్కుకుని ఎటు వెళుతున్నామో కూడా ఆలోచించుకోవటం లేదు. ఇది దురదృష్టకరం. పిల్లవాడి విద్యాభ్యసనం లో ఇప్పుడు నెలకొన్న అవాంచిత ధోరణులు ఎటువంటి విపరీతాలకు దారితీస్తాయో విద్యావేత్తలు నెత్తీ నోరు బాదుకుని చెబుతున్నా వినేవారు లేరు. ఇంగ్లీషు వాడి పాలనలో వాడి గుమస్తాగిరీ కోసం పోటీ పడి చదివినట్లుగానే ఈ రోజు అమెరికాలో రాత్రింబవళ్ళు గొడ్డుచాకిరీ చేసేందుకు నిద్రాహారాలు ,ఆటపాటలు మరచిపోయి మార్కులయంత్రాలుగా మారి పోతున్నారు . వాటికన్నా విశ్రాంతి ఉందిగాని పిల్లలకు ఆమాత్రం కూడా విశ్రాంతి లేదు .
ఖాళీ లేకుండా చదవాలి .అలాచదివించగలిగి తే చాలు .బట్టీ పట్టించి మార్కులు పిండగలిగితేచాలు ఎంతఫీజైనా కట్టి ఆసంస్థలలో పిల్లలను చేర్చటానికి డబ్బున్నవాల్లు ఎగబడుతున్నారు . ఇది చూసిన మద్యతరగతి, పేదవాల్లుకూడా అటువంటి బిల్డప్ లివ్వగల పాఠశాలలకు తరలిస్తున్నారు . ఆటపాటలకు కూడా పీరీయడ్ ల ను కేటాయించే ప్రభుత్వపాఠశాలలు పనికిమాలినవిగా పరిగణించబడుతున్నాయి . అక్కడున్న వ్యవస్థాపరమైన చిన్నలోపాలు కూడా వీటిని నిరాదరణకు గురిచేస్తున్నాయి . ఇక విద్యారంగం మీద ప్రేమతో విలువలు నమ్మి ఆటుపోట్లు తట్టుకుని నిలబడుతున్న విద్యాసంస్థలు ఈ భీకర తుఫానుకు అల్లలాడిపోతున్నాయి , కూకటివేళ్లతూ సహా పెల్లగించబడుతున్నాయి .
ఇక అర్ధమైనా కాకపోయినా పంజరం లో చిలకల్లా బట్టిపట్టి పలికే ఇంగ్లీషు మీడియంపిల్లలను చూసి జనం పల్లెపట్నం అన్న తేడాలేకుండా అందరూ ఇంగ్లీషుమీడియం మాత్రమే చదివంచాలనే నిర్ణయాలు ఉత్సాహంగా తీసుకుంటున్నారు . ఈ వ్యాపారం లాభదాయకంగా ఉండటంతో పెద్దపట్టణాలకు మాత్రమే ఇప్పటిదాకా పరిమితమైన కార్పోరేట్ విద్యాబేహారులుచిన్న పట్టణాలలో సైతం తమ దుకాణాలు తెరుస్తున్నారు . మాతృభాషలో విద్యాబోధన అంతరానితనమై పోతుంది రానురాను .
ఉదాహరణకు చూడండి . మా మండలం లో మూడు జిల్లాపరిషత్ పాఠశాలలు మరో మూడు ప్రైవేట్ పాఠశాలలు ఉండేవి మొన్నటిదాకా . వాటిలో పోటాపోటీగా చదువులు సాగుతున్నా ఆటపాటలకు కొదవలేదు , మన పాఠశాలకు రెండెకరాలస్థలం ఉన్నందున ,ఆటలు విద్యాభ్యసనంలో ఒక ముఖ్యమైన భాగమని నమ్మి ఉన్నందున ఆటలకు కొదువలేదు. దరిదాపు ప్రారంభించిన పదహారుసంవత్సరాలలో పదకొడుస్సార్లు రిజల్ట్స్ లో మన పాఠ శాల ప్రథమస్థానంలో నిలచింది .అంతే కాదు వేలరూపాయలు వసూలు చేసే వినుకొండలో పెద్దసంస్థలకు తగ్గకుండా మార్కులసాధించారు మన పిల్లలు .ఈ పోటీలో కొందరు కాపీ సెంటర్లకు పిల్లలను తరలించే అనైతిక మార్గాలు ఎన్నుకున్నారు. ఈపోటిలన్నీ తట్టుకుంటూనే ఉన్నాము సరే నిరుడు కేరళానుంచి కొందరువచ్చి సెయింట్ జూడ్స్ ఇంగ్లీష్ మీడియం పాఠశాల ప్రారంభించారు. అదీ ఇరుకు గదులున్న ఒక బిల్డింగ్ తీసుకుని . ఇక చూడండి రెండవతరగతి చదివేపిల్లల కూడా ఇంగ్లీష్ మీడియం కుమార్చి ఎల్ కీజీ లో చేర్చటానికి రైతులు విత్తనాలకెగబడ్డట్టు ఎగబడ్డారు.
మూడువందలమంది [పదవతరగతి తో సహా] విద్యార్థులున్న మన పాఠశాల కు వచ్చిన మొత్తం ఫీజులు దాదాపు నాలుగు నుండి ఐదులక్షలు . ఇక కేవలం ఐదవతరగతి వరకు మాత్రమే క్లాసులు నిర్వహించిన ఈ పాఠశాల వసూలు చేసిన మొత్తం పదహారు లక్షలరూపాయలు . ఇప్పుడు వాళ్ళు స్వంతగా స్థలం కొని దానిలో బిల్డింగులు ఒక చర్చి కూడా నిర్మిస్తూ రెండు వ్యాపారాలకు మార్గం సుగమమం చేసుకున్నారు. ఒకటవతరగతికి మాఫీజు ఎనిమిదివందలు .అదే ఇంగ్లీష్ మీడియం లో మూడువేలు . ఈ సంవత్సరం నారాయణ విద్యసంస్థలు వినుకొండలో బ్రాంచి తెరచాయి . వాళ్ల ఫీజు అదే క్లాసుకు ఆరువేలు పైనే. జనం పోలో మని పరుగెడుతున్నారు . బిల్డింగ్ అద్దెలకు తీసుకున్నారు కనీసం ఆటస్థలం లేదు .ఏదో ఎక్కడో ఉన్నట్లు రికార్డులలో చూపిస్తారు . తల్లిదండ్రులకు ఆవిషయం అక్కరలేదనుకోండి . వచ్చే సంవత్సరం భాష్యం ,శ్రీచైతన్య ఈ టెక్నిక్ స్కూల్స్ మొదలెట్టేందుకు ప్రయత్నాలు చేస్తున్నారని తెలుస్తుంది. అందరూ పల్లెలకు బస్సులను ఏర్పాటు చేస్తున్నారు.
ఇక ఇప్పుడు ఉన్న పెద్దవిద్యాసంస్థలలో కొత్త ట్రెండ్ మొదలైంది . ఆరవతరగతినుంచే ఐ.ఐటీ ఫొండేషన్ కొరకు శిక్షనట ! ఏమిటీ విపరీతాలు ? మొన్నటిదాకా ఎమ్సెట్ ప్రధానమని ప్రచారం చేశారు . ఇప్పుడిది . పిల్లవాడు పెరిగి పెద్దవాడయ్యాక ఏమి చేయాలో ఏమి చదవాలు కూడా వీల్లే నిర్ణయించేస్తున్నారు . తల్లిదండ్రులు ఏమాత్రం ఆలోచనలేకుండా అదొక అదనపు గొప్పతనంగా భావిస్తున్నారు. చిన్నపాఠశాలలు పిల్లలు లేక బోరుమంటూన్నాయి . ఇక ఈ పరుగు పందెంలో విలువలు , నమ్ముకుని మిగిలేదెవ్వరు ? పిల్లల సర్వతోముఖాభివృధ్ధి లాంటి లక్ష్యాలకొరకు కృషిచేసే దెవ్వరు ?
ఈ వ్యాపార ధోరణితో పాఠశాలలను మనం చేయగలమా ? ఎల్ కేజీ నుంచే ఎంసెట్ కోచింగులంటూ విపరీత ప్రచారాలు చేయటం మా లాంటి సంస్థలకు సాధ్యమా ?