శ్రీ గణపతి సచ్చిదానంద కృత హనుమాన్ చాలీసా(తెలుగు)

జై శ్రీరామ్,
శ్రీ రామదూతం శిరసా నమామి!
------------------------------------------------------


శ్రీ గురుచరణ సరోజ రజస్సుతో
మనసను అద్దము శుచి గావించి
రఘుపతి చరితము గానము చేయుచు
నాలుగు విధముల ఫలములనందుము

హనుమను విడువక తలచిన భక్తిగ
బుద్ధిహీనతలు తొలగును నిజముగ
బుద్ధిని బలమును విద్యనొసంగును
వికారదూరుడు ఆ ఆంజనేయుడు

౧) జయహనుమాన జ్ఞానగుణసాగర!
జయకపీశ మము కావర దేవర!!
౨) రామదూత అతులిత బలవంతా!
హనుమా నీవే మా బలమంతా!!
౩) మహా వీర విక్రమ భుజశాలీ!
కుమతిని చెరుపుట నీకది కేళి!!
౪) బంగరువన్నెతో వెలిగెడి దేవా!
గురువై మమ్మిక కావగ రావా!!!
౫) చేతను దాల్చిన వజ్రాదులతో!
విరాజమానుడవీవొక రీతి!!
౬) శంకర అంశజ కేసరి నందన!
తేజోరాశీ అంజని చందన !!
౭) విద్యావారిధి బహుగుణచతుర!
కార్యసిద్ధి కర కపివర వీరా!!
౮) భక్తితో రాముని కధలను వింటివి!
హృది సీతాపతి ఉన్నాడంటివి!!
౯) సూక్ష్మరూపమున సీతను పోల్చి!
పెద్దరూపమున లంకను గాల్చి!!
౧౦) భీమ రూపమున అసురుల గూల్చి!
రామకార్యమును చేస్తివి గెల్చి!!
౧౧) హే సంజీవన లక్ష్మణజీవన!
రామాలింగన పులకితభావన!!
౧౨) రఘుపతి కీరితి పెంచితివయ్యా!
స్వామికి భరతసమానుడవయ్యా!!
౧౩) వేయిపడగల ఫణి కీర్తించెను!
అదివిని రాముడు కౌగిట ముంచెను!!
౧౪) సనకాదులు బ్రహ్మాది సుధాదులు!
నారద తుంబురు శారాదాదులు!!
౧౫) ఇంద్రయమాదులు దిక్పదయుక్తులు!
కవులందరు నినుపొగడనశక్తులు!!
౧౬) సుగ్రీవుడు నీ మేలును పొంది!
రాముని కలిసె రాజ్యము పొందె!!
౧౭) అభయమునంది విభీషణుడేలె!
ఆ లంకేశుడు భయమున తూలె!!
౧౮) భానుని ఫలమని తలచి గ్రహించి
హనుమన్నాముడవైతివి దేవా!!
౧౯) ప్రభు ముద్రికను మోమున దాల్చి!
జలధిని దాటగ అచ్చెరువేమి!!
౨౦) జగమున దుర్గమ కార్యములన్నియు!
సుగమములాయెను నీ కృపతోడను!!
౨౧) రాముని ద్వారమునందున ఉందువు!
నీ ఆనతితో కదులును లోకము!!
౨౨) నిను శరణనగ కలుగును సుఖములు!
నీ రక్షణలో తొలగును భయములు!!
౨౩) నీ తేజోకర హుంకారముల!
కంపనమొందెను త్రిజగతి భయముల!!
౨౪) భూతప్రేత పిశాచములన్నియు!
నీ నామంబును పలికిన విడుచును!!
౨౫) రోగ వినాశము ,పీడా హరణము!
చేయును హనుమా నీ రఘుమంత్రము!!
౨౬) సంకటములనువు విడిపించెదవు!
ధ్యానమునందున మది గుడి వుందువు!!
౨౭) రాముడే గమ్యము ముని కులమునకు!
నీవే గమ్యము మాకందరకు!!
౨౮) నిను సేవించిన కోర్కెలు తీరును!
ముక్తిపదంబది జీవులకందును!!
౨౯) నీదు ప్రతాపము నాలుగు యుగముల!
సిద్ధిని పంచును,కీర్తిని పెంచును!!
౩౦) సాధురక్షకా,దుష్టశిక్షకా!
అసురనాశకా రామసేవకా!!
౩౧) అష్టసిద్ధి నవనిధులను ఒసగే!
హనుమకు సీతా కృపతో వెలిగే!!
౩౨) రమరసాయనమున్నది నీ దరి!
నువు కొలువుండుము హనుమా మాదరి!!
౩౩) నిని భజియించిన రాముడు దొరకును!
శతశతజన్మల పాపము తొలగును!!
౩౪) రాముని కొల్చిన అవసానమున!
భక్తుడు వెలుగును హరిధామమున!!
౩౫) మనసున హనుమను నిలిపిన సుఖము!
మరుజన్మములిక కలుగవు నిక్కము!!
౩౬) నీ స్మరణముచే కష్టము తీరును!
ఓమ్ బలవీరా పీడలు తొలగును!!
౩౭) జైజైజై హనుమాన గోసాయీ!
సద్గురురూపా బహుఫలధాయీ!!
౩౮) ఈ స్తోత్రమ్మును శతపర్యాయము!
చదివిన మోక్షము శివుడే సాక్ష్యము!!
౩౯) కవి వాల్మీకులు,తులసీదాసులు!
కరుణను తలచిరి ముక్తిని పొందిరి!!
౪౦) ఇది తెనిగించెను సచ్చిదానందుడు!
దీనిని చదివిన సచ్చిదానందము!!

పవన తనయ,సంకట హరణ, మంగళ మూరతి రూపా
సీతారాముల హృదయమునందున నిలిపిన వానర సురభూపా!!