హనుమంతుని ఆకలిని తీర్చగలగటం సాధ్యమా ! ?

వానరులందరికీ కడుపునిండా భోజనం పెట్టాలని ఎంతో ప్రేమతో ఏర్పాటు చేసిన విందు ప్రహసనం రసాభాసగా ముగిసింది . పాడు కోతులు బుద్ధిగా కూర్చోకుండా భీభత్సం సృష్టించాయి . వీటి బుద్ధిపోనిచ్చుకున్నాయి కాదు. అయినా వాటిననుకుని ఏం లాభం ? ఒక పక్కన మాఆయన చెబుతున్నా వినకుండా విందు ఏర్పాటు చేసిన నన్ననుకోవాలి ! ఇలా అమ్మవారు జరిగిన సంఘటనను తలుచుకున్నప్పుడలా బాధపడుతున్నారు. ఇంకొక పక్క ఆయనేమో బాగా జరిగింది నీ విందు కార్యక్రమం అన్నట్లు ముసిముసి నవ్వులు నవ్వుతూ , ఎగతాళి చేస్తున్నట్లనిపిస్తుంది ఆతల్లికి .
అయినా కోతులందరూ హనుమలాగా ఉంటారా ? నాపిచ్చిగాని . పాపం హనుమచూడు వెర్రి నాయన మామాట జవదాటడు . ఏదైనా సత్కరించాలన్నా అలాంటి బుద్ధిమంతుని సత్కరించాలి. అందులో అందరు వానరులొకపెట్టయితే ,హనుమంతుడొక్కడూ ఒకపెట్టు .కాబట్టి నా చేతులారావండి బిడ్దకు కడుపునిండా అన్నం పెట్టాలని సీతామాత నిశ్చయించుకుంది. హనుమంతుడైతే బుద్ధిమంతుడు అల్లరి చేయదని అమ్మ నమ్మకం . ఇక ఈవిషయం ముందుగా చెప్పటం ఎందుకులే అని రాములవారికి కూడా చెప్పకుండా మరొకమారి హనుమకు భోజనం పెట్టాలని ఏర్పాట్లు చేసింది .
హనుమను పిలచి నాయనా హనుమా ! రేపు నీకు నేను స్వయంగా వండి వడ్డిస్తాను భోజనానికి ఇక్కడకే వచ్చెయ్ నాయనా అని చెప్పింది .
నాకు మీ అభిమానం తో కడుపునిండింది చాలమ్మా ! రామనామస్మరణమే నాకు భోజనం .మీకెందుకు శ్రమ అని నసిగాడు హనుమ.
అయ్యో ! అదేమిటి నాయనా నీకు కడుపునిండా అన్నం కూడా పెట్టలేననుకున్నావా ? నాకోసం ఎంత శ్రమ పడ్దావు నువ్వు . నీకోసం వండి వడ్డించటం నాకు శ్రమెందుకవుతుంది ?రేపు నేను వడ్డిస్తే నీవు కడుపునిండా భుజించాల్సిందే అని పట్టుబట్టింది అమ్మవారు.
కానీ నాకు కొంచెం ఆకలెక్కువ తల్లీ . తినటం మొదలెడితే కడుపు నిండినదాకా తినాలి నేను సందేహం వ్యక్తం చేశాడు పవనసుతుడు .
ఏం పరవాలేదు నాయనా ! నీకు కావాల్సినంత వడ్డిస్తాను సరేనా అని హామీ ఇచ్చిందా లోకమాత .
సరే నమ్మా ! నీ మాట ఉల్లంఘించగలనా ? నాకడుపు పట్టినదాకా తృప్తిగా భుజిస్తాను అని వినయంగా పలికాడు హనుమ.
తన దు:ఖాన్ని తొలగించినవాడు. పుత్రసమానుడు అగు హనుమకోసం ఆతల్లి స్వయంగా భారీగా వంతకలు తయారు చేసి భోజనానికి పిలచింది .
హనుమంతుడు వచ్చి కూర్చున్నాడు . ఆపోశన పట్టాడు. భోజనం చేయటం మొదలయింది .పరిచారికలు అందిస్తుండగా విస్తర్లో వడ్దనలు మొదలయయ్యాయి. ఒక్కొక్కటిగా వస్తున్న వంటకాలు ఆవురావురుమని లాగించేస్తున్నాడు అంజనీ పుతృడు . సంతోషం గా వంటకాలు పళ్ళెరాలలో తెప్పించి వడ్డిస్తున్నది .. ఎంత ఆకలితో ఉన్నాడొ పిచ్చి నాయన అనుకుంటూ ఆతల్లి. ప్రవాహంగా వస్తున్న వంటకాలన్నీ జ్వలిస్తున్న అగ్నిలో పడిన ఘృతంలా ఆహుతవుతున్నాయి హనుమనోటిలో కెళుతూ. అమ్మవారు ఆశ్చర్యపోతున్నారు ,ఇదేమి తిండి అని
వడ్దన ఆగినప్పుడల్లా అమ్మా ! ఇంకొంచెం అని అడుగుతున్నాడు హనుమ.తెప్పించి వడ్డిస్తున్నది .వండినవి అయిపోతున్నాయి .
పరిస్థితి గమనించి వంటవాళ్లు కొత్తగా వండుతూనే ఉన్నారు . చాలటం లేదు . వంటవాళ్లకు చెమటలు పడుతున్నాయి. అమ్మవారికి అయోమయంగా ఉంది . వండినవి వండనివి ,కాయగూరలు పండ్లు ,వంట పదార్ధాలతో సహా ఉరుకులపరుగులమీద పరిచారకులు తెచ్చి పోస్తున్నా ఆగటం లేదు. సేవకులంతా రంగం లోకి దిగి ధాన్యం తోసహా తెచ్చిపోస్తున్నారు భయపడుతూ .మొత్తం హనుమ నోటిలోకి ప్రవాహంగా వెళ్లిపోతున్నాయి . ఇంకా .. అని అడుగుతున్నాడు హనుమ .ఎంత తెచ్చినా చాలటం లేదు .పంచభూతాత్మకుడు మహాభూతంలా తినేస్తున్నాడు. వడ్దించకపోతే అమ్దరినీ తినేసేలా ఉన్నాడు. అమ్మవారి మనసు ప్రమాదాన్ని శంకించింది . ఏమిటీ తిండి ? ఏమిటీ ఆకలి ? భూమ్మీదున్న సమస్తాన్ని తిని హరించేలా ఉన్నాడు హనుమ . ఎక్కడో పొరపాటు జరిగింది . హనుమకు ఆకలితీరుస్తానని మాటిచ్చి ఇప్పుడు సమస్యలో ఇరుక్కుపోయాను అని భీతి చెందింది . ఉరుకులపరుగులమీద రాములవారి సన్నిధికి చేరి శరణుప్రాణేశ్వరా అని వణికిపోతూ శరణు వేడింది .
ఏమైంది దేవీ ! స్వామి వారు అనునయించి అడిగారు
ప్రభూ ! హనుమంతునికి కడుపునిండాభోజనం పెడతానని మాటిచ్చాను .హనుమంతుడు నేను వండినవంటకాలనే కాదు .సమస్త లోకాన్నీ ఆరగించేలా ఉన్నాడు చూస్తుంటే ...అని అంతావివరించింది . హనుమంతుని ఆకలి తీర్చి తృప్తిపరచగల మార్గం చెప్పమని వేడుకున్నది.
ఎంత అమాయకురాలివి సీతా ! హనుమంతుని ఆకలి తీర్చటం అంత సాధ్యమనుకున్నావా ? హనుమ ఎవరనుకున్నావు ? సాక్షాత్తూ లయకారకుడైన శివాంశ సంభూతుడు . సకలసృష్టిని తన గర్భాన లయం చేసుకోగల పరమశివుని ఆకలి ఈ భౌతిక పదార్ధాలతో సాధ్యమనుకున్నావా ? సాధ్యాసాధ్యాలు విచారించక కడుపు నింపుతానని మాటిచ్చి ఉపద్రవం తెచ్చావు .అన్నారు శ్రీరామచంద్రుడు .
పరిష్కారం చెప్పమని వేడుకున్నది సీతామాత .
నువ్వెళ్ళి హనుమవెనుక నిలుచుని శివుణ్ణిస్తుతించు . భోళాశంకరుడు శాంతించి హనుమ ఆకలి శమిస్తుంది సూచించాడు స్వామి.
సీతమ్మ వెళ్ళి భుజిస్తున్న ఆంజనేయుని వెనుక నిలబడి పరిపరి విధముల పరమేశ్వరుని స్తుతించింది .
ఆతరువాత హనుమవిస్తట్లో ఒక అరటి పండూపెట్టి నాయనా ఇంకా వడ్డించనా అని అడిగింది.
చాలమ్మా ! కడుపు నిండిపోయింది .ఇక తినలేనుతల్లీ అంటూ బ్రేవ్ !మని త్రేన్చాడు హనుమ.