పంచాంగకర్తలకొక మనవి ........శాస్త్రాన్ని జనంలో పలుచనచెయ్యొద్దు .[500వ పొస్ట్]

భారతీయ ఖగోళ గణిత విజ్ఞానానికి అద్భుత ఉదాహరణ పంచాంగం . ఈనాడున్న గొప్ప గొప్ప యంత్రాల సహాయం లేకుండానే నాటి భారతీయ శాస్త్రవేత్తలు విశ్వరహస్యాలను వివరంగా చెప్పగలిగి జగద్గురువు ఈదేశమని గుర్తింపువచ్చేలా చేశారు. ఎందరో తపోధనులు తమ జీవితాలను ఈ విజ్ఞానరహస్యాలను కనుగొనేందుకే వెచ్చించారు . నాటి వారి త్యాగం వలన ప్రపంచం లో ఎవరికీ అందనంత శాస్త్రవిజ్ఞానం మనకందినది. దానిని లోకకళ్యాణానికి ఉపయోగించాలనే ధ్యేయంతో ఖగోళంలో జరిగిగే గ్రహాల చలనాలు భూమ్మీద ఏఏ ఫలితాలను కలగజేస్తాయో , మానవుల మనసు మీద వీని ప్రభావమేమిటో తమ జీవితపర్యంత పరిశీలించి ,పరిశోధించి లోకానికందించారు. ఇదో గొప్ప శాస్త్రంగా ప్రజలు సప్రామాణిక ఉదాహరణలతో పోల్చుకుని చూసి అమోదించి ,తమజీవితాలలో పెద్దలసూచనలను ఆచరిస్తున్నారు .ఈశాస్త్రాన్ని ఎప్పటికప్పుడు పంచాంగాల రూపంలో జనసామాన్యానికి అందుబాటులో ఉంచుతూ తరతరాలుగా జాతికి సేవచేస్తున్న మహానుభావులు పంచాంగ కర్తలు. వీల్ల సూచన కోట్లాది జనుల నమ్మకాలను ప్రభావితం చేస్తుంది .ప్రపంచ మంతా కాలగమనంలో జరిగేమార్పులను సంఘటనలను భారతీయులు ముందుగానే ఇంతచక్కగా ఎలా వివరిచగలుగుతున్నారా అని ఆశ్చర్యపోయి చూస్తూ ఈ శాస్త్రరహస్యాలను అధ్యయనం చేస్తున్న కాలమిది. ఇంతటి గురుతర బాధ్యత తలకెత్తుకున్న నేటి పంచాంగకర్తలలోను అపార మేధావులు ,అత్యంత నియమనిష్టలతో శాస్త్రాధ్యయనం చేసేవారున్నారు. ఇంతమంది పెద్దలు ఉండి నేడు పంచాంగం అంటే జనంలో గౌరవభావం పలుచనయ్యేవిధంగా వాతావరణం ఏర్పడటానికి కారణమేమిటో ఒక్కసారి ఆలోచించాలి.

కలి ప్రభావం అన్నింటినీ కలుషితం చేస్తున్నట్లుగానే ఇక్కడా వీరిమీదకూడా ప్రసరిస్తున్నట్లు అనిపిస్తున్నది. శాస్త్రకారుడు వాస్తవాన్ని మాత్రమే తెలిపే అధికారం కలిగి ఉన్నాడు. దైవానికి , విజ్ఞానద్రష్టలగు పూర్వ ఋషులకు మాత్రమే అభిమాని అయ్యుండాలి . శాస్త్ర విషయాలను శోధించి వివరించేప్పుడు మీ మనసులమీద ఏ అభిమానాలు లౌక్యాలు ప్రభావం చూపినా మీరు ఋషి రుణం తీర్చుకోవటమేమోగాని వారిపట్ల దోషం చేసినవారవుతారు.
మీ మీ వ్యక్తిగత అభిమానాలు ,ఎవరికైనా శుభవార్తలే చెప్పి సంతోషపెట్టాలనే లౌక్యం మీకు మేలుచేసి , నట్లు లోకానికి మేలుచేయదు. మిమ్మల్ని గౌరవించేది కేవలం శాస్త్రవిజ్ఞానం పట్లగల గౌరవంతోమాత్రమే . మీరు అభిమానాలకు లోనై పందిని నందిగా వర్ణించే కవితాగానాలు చేపడితే ,అది కాలగమనం లో వాస్తవరూపమేమిటో తెలిసాక ముందు మన శాస్త్రాలమీద ,ఆవెనుకనే మీమీద అందరూ నమ్మకం పోగొట్టుకుంటారు . మీరు అభిమానించే నాయకులతో సహా . ఎప్పుడు శాస్త్రాలలో ప్రామాణికత లోపిస్తుందో అది జనానికి దూరమైపోతుంది . తద్వారా ఆపాపం మీకే చుట్టుకుంటుంది . గత పది సంవత్సరాలుగా చూస్తున్నాము పంచాంగరచన చేసే శాస్త్రవేత్తలు పెరుగుతున్నారు . కానీ వారి అంచనాలు జనంలో గందరగోళం సృష్టించే అంశాలను కూడా ఎక్కువగానే చూస్తున్నాము. పండగల ను నిర్ణయించటం వద్దనుండి ఫలితాల దాకా . ఎందువలన జరుగుతున్నదిది ? శాస్త్రనిర్ణయాలలో సందేహాలొచ్చినప్పుడు .అదీ కోట్లాది ప్రజలమనో భావాలతో ముడిపడి ఉన్నప్పుడు మీరు కలసికూర్చుని సత్యశోధనకు పూనుకోరా ? ఇక్కడ ఎవరు ఏమి చెప్పారు ? అని చూడరు. పంచాంగం ఏమి చెబుతున్నది అనిమాత్రమే చూస్తారు సామాన్యజనం . అలాంటప్పుడు పాండిత్యస్పర్ధ లోకానికి మేలుచేస్తుందా ? కీడుచేస్తుందా ?అని ఆలోచించటం లేదా మీరు ?

సరైన పరిజ్ఞానం లేకుండానే పలనా పార్టీ గెలుస్తుందనిమీ వ్యక్తిగత అభిమానలతో బల్లగుద్దివాదిస్తూ ,కనిపిస్తారు టివీలలో కొందరు.అది మిమ్మల్ని ఒకవంక ఎగతాళిచేస్తూ నే దాన్ని మరింతగా బహిరంగపరచేందుకు కుర్చీలలో కూర్చోబెట్టి ప్రసారం చేసే టీవీ ప్రోగ్రామ్ముల్లో ఒకటని తెలిసీ పాల్గొంటుంటిరి. మరొకవంక పంచాంగ శ్రవణం లోనూ ఒక్కో పంచాంగానిది ఒక్కోమాట , సిద్ధాంతి కొక లెక్క అని మీ అభిమాన రాజకీయులచే మిమ్మల్నే విమర్శించే అవకాశం మీరే ఇస్తుంటిరి . ఏందుకీ అవమానం శాస్త్రానికి ? బిడ్డలు పెద్దవాళ్లై పదిమందిచే తల్లిదండ్రులను పొగిడేలా చేయాలి . కానీ తల్లివంటి శాస్త్రాన్నే అవహేళనపరచే స్థితి తీసుకువస్తున్న పెద్దలు మీ కేమని చెప్పగలము . అయ్యా ! మీపై మాకు విశ్వాసమున్నది .అంటే మీరు మాకు వ్యక్తిగతంగా పరిచయమై కాదు. మీరు ఆశ్రయించి వున్న శాస్త్రజ్ఞానం ఆధారంగా . దయచేసి మీరు ఆలోచించి శాస్త్రం విలువ తగ్గకుండా చూస్తారనే ఆశ మాకు ఉంది. ఇది మీపట్ల చులకనతో వ్రాయటం లేదు . పండితులైన మీరు సమదర్శులు . సామాన్యుల తరపున మేము తెలియజేస్తున్న విన్నపాన్ని ఆవేదనను అర్ధం చేసుకోవాలని మహోన్నత భారతీయ విజ్ఞానపరంపరకు వారసులుగామీరు జాతి కరదీపికలుగా మిగలాలని నమస్కరిస్తూ విన్నవించుకుంటున్నాము .