సమస్త సంపదలకూ మూలంమహాలక్ష్మి . ఆమె కృప వల్లనే మనకు ఆకర్షణీయమైన రూపం ఏర్పడుతోంది. ఆమె కృప వల్లనే విద్యాధికులమై, విఖ్యాతి పొందుతున్నాం. లకీకటాక్షం మానవులందరికీ అవసరమే. ఆ దేవి దయ ఉంటే అన్నింటా అభివృద్ధి. అంతులేనన్ని సంపదలు. ఆమె అనుగ్రహం పొందాలనుకునే వారందరూ ఆమె ప్రాణనాథుడు శ్రీమహావిష్ణువు జన్మనక్షత్రమైన శ్రవణా నక్షత్రం పేరు మీదుగా ఏర్పడిన శ్రావణమాసంలో విష్ణువల్లభను శ్రద్ధాభక్తులతో కొల్చి ఆమె అనుగ్రహానికిపాత్రులై ధనకనక వస్తువాహనాలు పొందాలని కోరుకుంటూ ఈ మాసంలో ఆచరించవలసిన విధులను వివరిస్తున్నాం.
సకల సౌభాగ్యాలకు, సిరి సంపదలకు, శుభకార్యాలకు ఆవాసం శ్రావణమాసం. కాబట్టి సంప్రదాయాలను పాటించే ప్రతి ఇంటి ముంగిటా చక్కగా నీళ్లు చల్లి, ముగ్గులు పెట్టి, గుమ్మాలన్నీ మామిడి తోరణాలతోటీ, గడపలు పసుపూ కుంకుమలతోటీ శోభాయమానంగా కనిపించే ఇంటిలో ఘల్లుఘల్లుమనే గజ్జల సవ్వడితో లకీదేవి కాలు పెడుతుంది. అమ్మ పాద స్పర్శ సోకితే నట్టిల్లు బంగారంగా మారుతుంది. ఇక ఆ యింటిలో సిరిసంపదలకు కొదవుండదు.
శివప్రీతికరం శ్రావణ సోమవారం
శ్రావణ మాసంలో వచ్చే సోమవారం శివునికి ప్రీతికర మెనది. కాబట్టి శివభక్తులు ఈ నాలుగు సోమవారాలు దీక్షగా ఉపవాసముండి శివుడికి అభిషేకం, రుద్రనమకం, చమకం పఠిస్తారు. పార్వతీదేవికి కుంకుమ పూజ చేస్తే అయిదవతనం కలకాలం నిలచి ఉంటుందని భక్తుల నమ్మకం.
ముఖ్యమైన పండుగలు ఇవి
ఈ నెలలో వచ్చే సోమ, మంగళ, శుక్ర, శనివారాలు ఎంతో పవిత్రమైనవి.మంగళ గౌరీవ్రతం, నాగపంచమి, భానుసప్తమి, పుత్రదా ఏకాదశి, దామోదర ద్వాదశి, వరాహజయంతి, వరలకీవ్రతం, జంధ్యాల పౌర్ణమి, పోలాల అమావాస్య వంటి పండుగలు, పర్వదినాలు ఈ మాసంలోనే వస్తాయి.
మంగళగౌరీవ్రతం: మంగళకరమైన తల్లి మంగళగౌరీ దేవి. పెళ్లికాని పడచులు గౌరీదేవిని పూజిస్తే మంచి భర్త లభిస్తాడని, పెళ్లయిన వారు ఈ వ్రతం ఆచరిస్తే సౌభాగ్యం కలుగుతుంది. కోరిన కోరికలు తీరతాయని ప్రతీతి. అందుకే నూతన వధువులు సౌభాగ్య సిద్ధికోసం ఈ మాసంలోని ప్రతి మంగళవారం నాడు మంగళ గౌరీవ్రతం ఆచరించడం సంప్రదాయం. పసుపు, కుంకుమ, పూలు, సుగంధ ద్రవ్యాలు, ఆవునేతితో వెలిగే జ్యోతిరూపంలోనూ మంగళగౌరి కొలువై ఉంటుంది.అందుకే ఈ మాసంలో ఇంటికి వచ్చిన ముత్తయిదువులకు మంగళకరమైన వస్తువులను ఇచ్చి, వారి ఆశీర్వాదం పొందడం శుభకరం.
నాగపంచమి: హిందువుల ప్రధాన పండుగల్లో నాగపంచమి ఒకటి. కన్నెపిల్లలు, గర్భధారణలో ఆటంకాలు ఏర్పడుతున్నవారు, కుజదోషం కారణంగా వివాహం ఆలస్యం అవుతున్నవారు ఈ పండుగను జరుపుకుంటే, స్వాంతన చేకూరుతుందని శాస్త్రోక్తి. ఈరోజున గోడపై పసుపు కుంకుమలతో నాగమూర్తులను లించిగాని లేదా మృత్తికాదులతో నిర్మించిన సర్పాలను గాని పూజించాలి. పంచమినాడు సర్పాలను పూజించిన వారికి సర్పభయం ఉండదని విశ్వాసం.
భానుసప్తమి: ఈరోజున ప్రత్యక్షనారాయణుడైన సూర్యుడిని ఆరాధించడం వల్ల ఆరోగ్యం చేకూరుతుంది. అభీష్టాలు సిద్ధిస్తాయి.
పుత్రదా ఏకాదశి: పూర్వం రాజులు పుత్రసంతానం కోసం ఈ వ్రతం ఆచరించి ఫలితాలు సాధించేవారు. కాబట్టి ఈ ఏకాదశి నాడు శ్రద్ధగా విష్ణుపూజ చేస్తే సంతాన ప్రాప్తి కలగడం తథ్యమని పురాణ కథనం. శ్రావణ శుద్ధ ఏకాదశికి పుత్రదా ఏకాదశి అని పేరు. ఈరోజున విష్ణుపూజ, ఉపవాసం, జాగరణ చేసి, గొడుగు దానం చేస్తే విశేష పుణ్యదాయకం.
దామోదర ద్వాదశి: దామోదర ద్వాదశిగా పేరుగాంచిన శ్రావణ శుద్ధ ద్వాదశినాడు విష్ణుపూజ, విష్ణుసహస్రనామ పారాయణ చేసి, విష్ణుప్రతిమను దానం చేస్తే మంచిది.
వరాహజయంతి: శ్రీమన్నారాయణమూర్తి వరాహ రూపంలో అవతరించిన శ్రావణ శుక్ల త్రయోదశినాడు వరాహస్వామివారికి పూజలు, అర్చనలు చేయడం వల్ల విశేష ఫలితాలు కలుగుతాయని ప్రతీతి.
జంధ్యాల పున్నమి లేదా రాఖీపూర్ణిమ: దైవీశక్తులతో కూడిన శ్రావణ శుద్ధ పూర్ణిమను రాఖీపూర్ణిమగా, జంధ్యాల పూర్ణిమగా జరుపుకుంటారు. శక్తిస్వరూపిణిగా వ్యవహరించబడే ఇంటి ఆడపడచు(సోదరి) చేత ఈరోజు రక్షాబంధనం కట్టించుకున్న సోదరులకు దేవతలు రక్ష గా నిలిచి అరిష్టాలను తొలగిస్తారని, అన్నింటా అండదండగా నిలుస్తారని విశ్వాసం. ఈరోజున బ్రాహ్మణులు, వైశ్యులు, క్షత్రియులు తదితర జంధ్యాన్ని ధరించే అన్ని కులాలవారు స్నానాన్ని ఆచరించి నూతన యజ్ఞోపవీతం ధరిస్తారు. కొత్తగా ఉపనయనం జరిగిన వారికి ఉపాకర్మ జరిపిస్తారు. అందుకే దీనికి జంధ్యాల పూర్ణిమ అని పేరొచ్చింది. ఈరోజునే హయగ్రీవ జయంతి
"జ్ఞానానంద మయం దేవం నిర్మల స్ఫటికాకృతిం
ఆధారం సర్వవిద్యానాం హయగ్రీవముపాస్మహే'
అంటూ సర్వవిద్యలకూ ఆధారభూతంగా చెప్పుకునే హయగ్రీవుని స్తుతించడం వల్ల విద్యార్థులలో జ్ఞాపకశక్తి పెరుగుతుందని శాస్త్ర వచనం.
కృష్టాష్టమి: శ్రీకృష్ణ పరమాత్మ ఆవిర్భవించిన దివ్యతిథే కృష్ణాష్టమి. ఈరోజు ఉదయాన్నే స్నానపానాదులు చేసి షోడశోపచారాలతో కృష్ణుని అర్చించాలి. కృష్ణునికి ఇష్టమైన సాత్వికాహారం పాలు, పళ్లు, వెన్న, మీగడ మొదలైన వాటితో నైవేద్యం పెట్టాలి. కృష్టాష్టమి రోజున కృష్ణుని అర్చిస్తే సకల పాపాలు పోతాయి. ధర్మార్థ కామ మోక్షప్రాప్తి, కార్యజయం కలుగుతాయని స్కాందపురాణంలో కనిపిస్తుంది..
కామికా ఏకాదశి: శ్రావణ బహుళ ఏకాదశికి కామికా ఏకాదశి అని పేరు. ఎందుకంటే ఈ రోజున ఏకాదశీ వ్రతాన్ని ఆచరిస్తే కోరికలు తీరతాయట. ఈ రోజు వెన్నను దానం చేస్తే విశేష ఫలితాలు పొందవచ్చు.
లకీదేవి ఎక్కడ నివసిస్తుంది?
గోవులు, తామరపుష్పాలు, పాడిపంటలు, ఏనుగులు, గుర్రాలు, రత్నాలు, అద్దాలు, శంఖనాదం, ఘంటారావం, హరిహరార్చన, పూజామందిరం, సర్వదేవతలనూ అర్చించే వారి స్వరం, తులసి ఉన్న ప్రదేశం, పూలు, పండ్లతోటలు, మంగళకరమైన వస్తువులు, మంగళవాద్యాలు, దీపకాంతులు, కర్పూర హారతి, చెట్లలోని హరిత వర్ణం, స్నేహం, ఆరోగ్యం, ధర్మబుద్ధి, న్యాయస్థానాలు, శుచి, శుభ్రత, సదాచార పరాయణత, సౌమ్యగుణం, స్త్రీలు ఎటువంటి చీకూచింతా లేకుండా హాయిగా ఉండే ఇండ్లు, బ్రాహ్మణులు, విద్వాంసులు, పెద్దలు, పండితులకు సన్మాన సత్కారాలు జరిగే ప్రదేశాలు, వేదఘోష, సత్వగుణ సంపదలు, క్రమశిక్షణ, కార్యశూరత్వం, సమయపాలనలోనూ మహాలకి నివసిస్తుంది.
సంపదలంటే ఏమిటి?
సాధారణంగా మనం ధనం అంటే డబ్బు ఒక్కటే అనుకుంటాము. అయితే ఆయుష్షు, ఆరోగ్యం, ఐశ్వర్యం, ధైర్యం, స్థ్యైర్యం, విజయం, వీర్యం, అభయం, శౌర్యం, సౌభాగ్యం, సాహసం, విద్య, వివేకం, ధనం, ధాన్యం, సంపద, బంగారం, వెండి, ఆభరణాలు, వస్తువులు, వాహనాలు, ఆయుధాలు, పశువులు, పుత్రపౌత్రాదులు, కీర్తిప్రతిష్ఠలు, సుఖసంతోషాలు మొదలైనవన్నీ సంపదలే. వీటన్నింటికీ అధినేత్రి ఆ తల్లే.ఆమె అనుగ్రహంతోటే సాధ్యం. కాబట్టి ఆమెను పూజించి ఈ సంపదలను పొందుదాం.
శ్రావణమాసంలోని ముఖ్య పర్వదినాలు
నాగపంచమి: జులై 26
మంగళగౌరీవ్రతం: జులై 28
వరలకీవ్రతం: జులై 31
పుత్రదా ఏకాదశి: ఆగష్టు 1
దామోదర ద్వాదశి: ఆగష్టు 2
రక్షాబంధన దినోత్సవం: ఆగష్టు 5
కృష్టాష్టమి: ఆగష్టు 13
పోలాల అమావాస్య: ఆగష్టు 20
[ సాక్షి పత్రికనుండి డి. వి. ఆర్ .భాస్కర్ గారు వ్రాసిన వ్యాసం భాక్తజనుల కోసం ఇక్కడ వుంచుతున్నాను .]
Read more...
.jpg)
